4 sakyanan nagkarambola sa SRP
CEBU, Philippines - Naghuot ang dagan sa trapiko sa South Road Properties (SRP) duol sa may taytayan pasado alas 10 kagahapon sa buntag human nagkarambola ang upat ka sakyanan.
Ang upat ka sakyanan naglangkub sa Ken Taxi nga gimaneho ni Oscar Larosa, 40; Honda Fit nga gimaneho ni Catherine Solicar, 36, taga dakbayan sa Talisay; Ananias Cabusas, 34, nagmaneho sa Hyundai van nga taga Campo 2, Talisay, ug usa ka 10-wheeler wing van nga gimaneho ni Luis Pordan, 34, nga taga probinsya sa Negros.
Matud ni Senior Police Officer 1Dionesio Galo, imbestigador sa Traffic Patrol Group (TPG), nga nahinabi sa Banat News nga pareho’ng direksyon ang taxi, kotse ug van apan kalit lang nibangga ang van sa likod sa kotse nga nibangga sab sa nag-una nga taxi.
Sumala pa ni Galo nga samtang nagpaabot og traffic enforcer ang mga nalambigit sa aksidente kalit lang nisulod sa tunga sa van ug kotse ang trak nga nisabod sa side mirror sa van.
Gumikan sa hitabo halos 15 minutos nga naghuot ang dagan sa trapiko sa mao’ng dapit.
Hinoon wala’y naangol sa mao’ng insidente ug gitug-an ni Galo nga nagkasinabot ra ang mga nalambigit sa hitabo nga magbayranay na lang sa mga danyos sa sakyanan. (BANAT NEWS)
- Latest
