CEBU, Philippines - Hayan dili na mopapili si kanhi gobernador Emilio “Lito” Osmeña sa pagka-gobernador sa 2016 human ang iya’ng suod nga higala nga si kanhi bokal, Atty. Winston Garcia, ang posible’ng kandidato sa One Cebu Party.
Sa interbyu sa dyLA kagahapon, si Garcia niingon nga posibleng ang anak ni Osmeña nga si Mariano “Mimo” Osmeña ang iya’ng makapares.
Samtang giangkon ni Lito nga nagkaestorya sila ni Garcia duha ka semana na ang nakalabay apan iyang giklaro nga dili niya padaganon si Mimo sa bisan unsang posisyon.
Matud ni Lito nga nakapaduhaduha kaniya sa dili na lang pagdagan mao ang kahimtang sa iyang panglawas.
Buot pa usab sutaon ni Lito ang managan sa nasudnong posisyon aron ang iyang suportahan mao kadtong makapasalig sa pag-uli sa P14 bilyones nga gibayad sa GMR-Megawide isip premium bugti sa katungod pagpadagan sa airport terminal.
Matud ni Garcia, si Gobernador Hilario Davide III wala gani mosupak nga dad-on sa kaulohan ang gibayad sa GMR Megawide nga ang maong kwarta angayang anhi sa Sugbo gamiton pagpalambo sa runway sa tugpahanan aron mamahimong takos pagdawat og dugang nga mga international flights.
Gipahibawo ni Garcia nga nagtagbo sila ni Senador Grace Poe ug Senador Chiz Escudero sa niaging semana kalabot niini ug nipasalig sila nga suportahan ang iyang maong plano. (BANAT NEWS)