Personal nga bikil ang gisubay

CEBU, Philippines – Personal nga bikil ang gitan-aw nga motibo sa pagpusil patay sa usa ka negosyante nga nanag-iya og imnanan ug kan-anan nga gipusil sa Maria Cristina Street, Brgy. Kamputhaw niadtong nakalabay nga adlaw.

Kini ang gitug-an ni Senior Inspector Elisandro Quijano ang hepe sa Homicide Section sa Cebu City Police Office nga nahinabi sa Banat News.

Ang maong negosyante mao si Paul Domingo, 39, tag-iya sa Bordz Bar.

Matud pa ni Quijano ilang gisubay ang usa ka kostumer nga nakaaway sa biktima duha ka tuig na ang nakalabay human kini nanggubot sulod sa bar niini nga mibahad nga mobalos.

Gisusi usab nila ang impormasyon nga dunay gikostudiyang motorsiklo ang biktima nga iya sa nakabangga sa sakyanan sa uyab sa iyang higala kay way ikabayad sa danyos.

Sigun pa ni Quijano nga tanang mga nangaging posibleng nakabikil niini ila karong gisubay.

Duna’y close circuit television (CCTV)  nga nakuha ang kapulisan nga nakita ang pagpatay ni Domingo apan dili maklaro ang panagway sa gunman.

Samtang ang hepe sa City Intelligence Branch (CIB), Supt. Romeo Santander  miangkon nga iyang higala si Domingo ug mihulagway niini nga usa ka maayong tawo.

Nagkanayon si Santander nga kung tan-awon sa kuha sa CCTV klaro kaayo nga nakaila ang gunman kang Domingo. – /EIM) (BANAT NEWS)