CEBU, Philippines – Ang warden sa Talisay City Jail mipalambo karon sa panginabuhian sa mga binilanggo aron nga mahimong mapuslanon ang pag-estar nila sa bilanggoan.
Matud ni Jail warden Chief Inspector Felipe Montejo nga ang paghatag og higayon nila nga makakuwarta ang mga binilanggo gitumong aron nga makatabang gihapon sila sa ilang pamilya nga naa sa gawas.
Sumala pa ni Montejo nga ang gikalingawan karon sa mga piniriso mao ang pagpanghimo og Wood Furniture, paghimo og sandal, welding, pamaagi sa pagpanguma ug uban pa.
Si Montejo miingon nga kadtong mga kuwartahan nga anaa nabilanggo wala kaayo mosalmot sa gitanyag nga livelihood projects.
Walay mga dagku’ng problema nga giatubang ang warden sa Talisay City Jail. Ang mao nga bilanggoan nahimo kaniadto nga Best City Jail sa tibuok nasud tungod sa kanindot niini og sistema.
Ang matag brigada gibuwag ug sa ingon nga paagi ang mga guwardiya dili mabutang sa peligro kun magpahigayon sila og pag-ihap sa mga binilanggo kada gabii ug sayong buntag. – /RUB) (BANAT NEWS)