Negosyante gipatay

CEBU, Philippines – Sulod sa tambalanan nakabsan sa iyang kinabuhi ang usa ka negosyante human kini gipusil sa usa ka lalaki makaduha ka higayon samtang gikan nangihi ug paingon na unta mopauli diha sa Maria Cristina Extension, Brgy. Kamputhaw ning dakbayan sa Sugbo kagahapon sa kaadlawon.

Ang biktima mao si Paul Domingo, 39, tag-iya sa Bordz Bar nga nahimutang sa maong dapit nga taga Panagdait, Brgy. Kasambagan sa samang dakbayan. Samtang ang gunman gihulagway lang nga nagsuot og helmet apan wala’y tabon sa nawong.

Matud pa ni Senior Police Officer 4 Alex Dacua, imbestigador sa Homicide Section sa Cebu City Police Office nga nahinabi sa Banat News, gikan sa iyang bar ang biktima kauban ang iyang usa ka higala.

Mopauli na unta kini kauban ang higala nga si Lyndon Cempron sakay sa Isuzu D-Max nga gimaneho ‘sab sa biktima. Apan wala pa sila nakalayo og padagan gihunong sa biktima ang sakyanan kay kini gusto nga mangihi.

Sa dihang mibalik na kini og sakay sa sakyanan, usa ka lalaki ang kalit lang naabot ug nangutana sa biktima nga nagkanayon “Kaila pa ka nako? Nakahinumdom pa ka  sa gibuhat nimo naku?” Sumala pa nga nadunggan pa ang biktima nga mitubag og “Wala nako kahinumdom, kinsa man ka?” Sumala pa ni Dacua nga human sa panag-estorya sa duha giablihan sa gunman ang pultahan sa likod sa sakyanan ug gikuha ang sling bag sa biktima. Didto nakahigayon og layog ang biktima sa suspetsado hangtod nga nabuhian sa gunman ang bag apan kalit kining miibot og pistola ug gipusil ang biktima makaduha ka higayon sa kilid sa lawas niini.

Human sa hitabo dali nga misibat ang gunman samtang ang biktima gidala gilayon sa Cebu Doctors Hospital apan matud pa ni Dacua, pipila ka oras ang milabay nakabsan kini sa iyang kinabuhi.

Sa crime scene narekober sa kapulisan ang duha ka basiyo sa bala kalibre .45. Kagahapon sa hapon ang pamilya sa biktima mibisita sa buhatan sa Homicide Section aron magpatabang sa maong hitabo.

Usa sa ilang gisubay kung nakuhaan ba og hulagway sa close circuit television (CCTV) ang gunman nga gikatahong nabantayan nga taud-taod na nga nag-estambay sa gawas sa bar sa biktima. Si Dacua miingon nga personal nga bikil ang anggulong ilang gitan-aw sa maong hitabo. Apan wala ‘sab gipadaplin sa kapulisan ang uban pa nga motibo sa krimen. – /EIM) (BANAT NEWS)