CEBU, Philippines - Usa ka 2-anyos nga bata ang namatay samtang laing upat sa ilang pamilya kauban ilang apohang lalaki ang nagdaut ang tiyan human giingong nangalanag sa gi- repacked nga biscuits diha sa Sitio Malingin, Brgy. Punta Engaño, dakbayan sa Lapu- Lapu.
Ang namatay mao si Karl Jade Talingting, matud pa namatay siya sa miaging Huwebes sa gabii human nakakaon sa biscuit nga hinatag sa iyang silingan niadtong Miyerkules sa hapon.
Ang mga igsuon ni Talingting nga sila si Claralyn, 4 anyos, Chloe, 3 anyos, Clarence, 6 anyos pulos nalandig sa Vicente Sotto Memorial Medical Center kay nagkalibanga ‘sab human mikaon sa maong biskwit.
Kauban nga nahilo mao si Andres Sabidor, 60 anyos ug Jaden Liam Cañamo, anak ni Gretchen Jugan, 23 anyos, kinsa maoy giingong nanghatag sa biskwit.
Nagkanayon si Police Officer 2 Joseph Cutanda, imbestigador sa Lapu- Lapu City Police Office- Homicide Section nga si Jugan ang nipalit sa maong biskwit gikan sa iyang kauban sa trabaho nga nailhan pa sa pangalang “Marichu.”
Si Jugan misaysay nga wa siya magtuo nga dunay mahilo sa biskwit kay ikaupat na kining higayon nga mipalit siya ni Marichu sa maong biskwit.
Duha ka putos sa maong biskwit nga way label ug walay nakabutang nga expiry date sa mga pakete sa biskwit ang iyang napalit.
Matud niya, niadtong Martes sa gabii nabantayan ni Jugan nga nag-umog ang duha ka kilong sagol-sagol nga biskwit nga iyang napalit kang Marichu apan wala niya kini tagda.
Ang usa ka putos sa maong biskwit nga naay wafer nga naay palaman ug crackers maoy gihatag niya sa iyahang anak ug sa mga silingang bata. Matud niya nakatulog pa ang mga bata niadtong Miyerkules sa hapon human nakakaon apil iyang anak, apan nianang pagmata, nagsuka-suka na kini hasta ang ubang mga nakakaon sa biskwit.
Dali silang gidala sa VSMMC apan nakalas gyud si Talingting niadtong Huwebes tungod sa matud pa ‘shock.’
Gipahimangnuan sa kapulisan si Jugan nga mohatag og sample sa biscuit aron matan-aw sa laboratoryo apan si Jugan niingon nga nalabay na niya ang biskwit tungod sa kalagot sa ilang gidangatan.
Ang maong mga biskwit gikatahong gikan sa usa ka kompanya nga naghimo niini, apan gi-reject tungod kay dunay depekto ang pagkahimo, apan gibaligya kini sa gawas nga pinutos lang og ordinaryong plastik. (BANAT NEWS)