Pagpalambo sa CSBT padayunon

CEBU, Philippines - Ang kagamhanan sa probinsiya di motuo nga i-hostage sa kagamhanan sa dakbayan sa Sugbo ang pagproseso nila sa building permit sa Cebu South Bus Terminal (CSBT).

Kini bisan dunay tinguha si Mayor Michael Rama sa pagpabalhin sa CSBT sa gawas  sa dakbayan aron moluag ang trapiko sa kadalanan sa dakbayan sa Sugbo.

Si Ethel Natera, provincial information officer ug Ramon Dumayac, operations manager sa CSBT nagkanayon nga wala pay pormal nga panagsabot ang kagamhanan sa probinsiya ug sa siyudad  kabahin sa pagpabalhin sa CSBT.

Ang kagamhanan sa probinsiya padayon sa pagproseso sa building permit sa CSBT alang sa kaugmaran niini.

Sobra sa 20 ka tuig na sukad matukod ang CSBT apan niining ulahi lang naproseso ang building permit niini tungod kay usa kini sa mga rekisitos alang sa conversion sa electrical system sa terminal gikan sa phase 1 ngadto sa phase 3 aron mabalik ang  pag air-condition niini.

Sa laing bahin, si Dumayac misugyot ngadto kang Gob. Hilario Davide, III nga mangutang og P100 milyones alang sa expansion sa CSBT.

Gipasalig ni Dumayac nga ang maong kantidad mabayran sulod sa duha ngadto sa tulo ka tuig gikan sa abot sa   terminal. Gikan sa Enero hangtud sa buwan sa Hulyo niining tuiga mikabat na ngadto sa P38.5 milyones ang abot sa CSBT ug naglaom kini nga karong tuiga mokita ang terminal og P70 milyones, P50 milyones ang ginansyahon kun mabayran ang tanang expenses sa operasyon. (Brenda D. Batuto/EIM)(BANAT NEWS)