Tommy nakigtagbo sa mga kawani sa Lahug

CEBU, Philippines - Ang tanang opisyal ug kawani sa Barangay Lahug, dakbayan sa Sugbo, nakigtagbo kang kanhi kongresista Tomas R. Osmeña didto sa panimalay ni City Councilor Mary Ann delos Santos kaniadtong Huwebes sa gabii.

Nagtuo na g’yud ang kadaghanan sa mga kawani sa Lahug nga si Delos Santos makig-alyado na sa Bando Osmeña Pundok-Kauswagan (BOPK), ang politikanhong pundok nga gipangulohan ni Osmeña.

Apan si Delos Santos, kanhi sakop sa Team Rama, nagpabilin nga nagpakahilom ug wala pa g’yud mokumpirmar nga siya makig-alyado na sa BOPK apan daghan ang nagtan-aw nga ang pagpatawag ni Delos Santos sa mga kawani sa Lahug aron nga mahimamat sila ni Osmeña klaro na kaayo nga indikasyon.

Atol sa pipila ka oras nga panagtigum, gipahimuslan ni Osmeña ang pagpangayo’g pasaylo ngadto sa taga Lahug kun siya nakahimo man og sayop atol nga siya pa ang mayor sa dakbayan sa Sugbo.

Si Delos Santos maoy kapitan sa Lahug atol nga mayor pa usab si Osmeña  nga iyang kontra kaniadto. (Rene U. Borromeo)(BANAT NEWS)