CEBU, Philippines - Nagpakitabang sa Fuente Police Station ang usa ka Amerikano human gikawatan sa iya’ng 18-anyos nga Pinay nga uyab sa gipuy-an nga hotel sa Don Gil Garcia St., Capitol Site, dakbayan sa Sugbo sa nakalabay nga kadlawon.
Ang biktima naila nga si Ronald Earl Powell, 76, taga Atlanta Georgia ,USA samtang ang suspek nga nakasibat naila nga si Michelle Manayon, taga lungsod sa Balamban. Matud ni Police Officer 1 Christian Rollon, desk officer sa Fuente Police Station, nga ang langyaw nisugilon nga niadto’ng nakalabay nga kadlawon nagkaaway sila sa iya’ng uyab sa hotel.
Tunga-tunga sa ila’ng tinubagay nakahukom ang langyaw nga manaug aron tawgon ang guwardiya sa hotel.
Apan sa iya’ng pagbalik nahanaw na ang babaye ug lakip sa nawala ang iya’ng P12,000 nga kwarta. (BANAT NEWS)