CEBU, Philippines - Dul-an 50 ka mga residente sa Barangay Southern Poblacion ug Mc Arthur sa lungsod sa Tudela ang gikatahong nangalanag human nakakaon og inutang nga inasal niadtong Lunes.
Matud pa nanakit ilang tiyan, nalipong, gikalibanga ug ang uban gipanghilantan sumala pa sa naabot nga report diha sa Provincial Health Office.
Si Junie Balorio, 27, nitug-an sa Banat News nga inutang nila ang inasal apan pagkasunod adlaw nalipong, nagsuka ug gihilantan iyang asawa hinungdan nga niadto sila gilayon sa health center.
Gihulagway ni Balorio nga ang maong inasal, dili na init ug dugoon pa ug lagum-lagum ang kolor niini.
Samtang si Daisy Estrera, ang nurse deployment project sa Department of Health nga nadestino sa Tudela Rural Health Unit nibutyag sa Banat News nga 43 ka mga tawo ang nidangop sa ilahang klinika ug nagmulo kay nanglapoy ilang lawas, dunay hilanat, nagsuka ug kalibang.
Subay niini, si Dr. Mario Joyag, tigpamaba sa PHO nagkanayon nga sa ilang nadawat nga report 15 lang sa mga biktima ang gidala sa Ricardo Maningo Memorial Hospital sa lungsod sa San Francisco, Isla sa Camotes apan sagad nakauli na.
Apan si Linda Lazaga ang Sanitary Inspector sa Tudela , nibutyag sa Banat News nga 47 ang ilang natala nga apektado sa pagkalanag ug ila nang gikuhaan og stool sample ang mga biktima aron masuta ang hinungdan sa ilang pagkalanag.
Nagdumili hinuon si Joyag pagtumbok nga ang inasal nga parehong nakaon sa mga biktima ang hinungdan niini. Apan kun tinuod kini, nagtuo sila nga masakiton o nagluya na ang maong baboy dihang giihaw ug giluto.
Gipatawag na usab ang tag-iya sa inasal ug sa nag-asal miingon wala pa sukad dunay nahitabo nga susama niini.
Apan si Mayor Eric Yu nibutyag nga iyang gipasusi sa iyang municipal social welfare officer kung unsay ilang matabang sa mga biktima.
Sa laing bahin, lima na lang ka mga tinun-an sa Hipodromo Elementary School ang nagpabilin sa Cebu City Medical Center tungod sa pagkalanag sa gituohang nakaon nilang masi ug puto niadtong Miyerkules.
Matud pa ni Dr. Gloria Duterte, Chief of Hospital sa CCMC, ang masi ug puto maoy ilang tungod kay mao kini ang sagad nakaon sa mga bata. (BANAT NEWS)