CEBU, Philippines - Gipahinumduman sa Department of Health ang publiko nga dili likayan ang mga tawo nga nataptan sa sakit nga tuberculosis (TB).
Buot sa DOH nga wagtangon ang mao’ng stigma hinungdan nga ila’ng gipahigayun ang caravan sa kalungsuran aron mapahibawo ang katawhan nga dili angay ikauwaw ang mao’ng sakit.
Lakip sa ila’ng tinguha nga masayud ang publiko nga may libre’ng tambal ang matag Barangay Health Center sa mao’ng sakit. Ang buwan sa Agosto gideklarar nga Tuberculosis Month.
Gibutyag ni Dra. Eugenia Canal, medical officer III sa DOH-7, nga matag usa aduna sa mao’ng kagaw apan mapukaw lang kini kun maluya ang resistensya sa usa ka tawo.
Kinahanglan nga dali nga mapatambalan ang may sakit aron dili makatakod sa ubang kabanay. (BANAT NEWS)