Palma moaksyon bahin sa ACC sa kalungsoran

CEBU, Philippines - Ang Archdiocese of Cebu mopagawas og circular letter pipila ka adlaw gikan karon aron klarohon nga ang Apostolic Catholic Church (ACC) nga nagpahigayon og mga  misa sa pipila ka mga lugar sa amihanang bahin sa Sugbo dili sakop sa Simbahang Romano Katoliko.

Matud pa ni Msgr. Joseph Tan, ang tigpamaba sa Archdiocese of Cebu sa pakighinabi sa Banat News nga ini og balik nila ni Archbishop Jose Palma gikan sa panagtigom sa mga opisyales sa umaabot nga International Eucharistic Congress  2016 didto karon sa kaulohan, mopagawas ang arsobispo sa maong circular letter.

Nanghinaut si Tan nga ang nagpailang pari nga si Zosimo Enricoso o mas naila nga Apo Elmo De Siena "mosunod sa guidelines” ug “morespeto sa pagtuo sa ubang tawo ug dili manglingla sa mga binunyagan."

Si Tan nibutyag, walay naka-schedule nga panagtagbo tali ni Enricoso ug ni Archbishop Jose Palma, hinungdan ang arsobispo mopaguwa og circular letter sa iyang pagbalik sa Sugbo.

Samtang si Fr. Nestor Atillo, sa St. Martin De Porres sa Ilijan, Tabogon nibutyag usab sa Banat News nga iyaha nang gipahimangnoan ang iyang ginsakopan nga dili makiglambigit sa maong grupo.

Nagbutang na usab siya og tarpaulin nga nagpahimangno sa katawhan nga dunay nag pari-pari nga nisulod sa iyang parokya samtang nagpaabot siya sa circular letter gikan sa Arsobispo. (BANAT NEWS)