CEBU, Philippines - Kapin sa 100 ka kawani sa munisipyo sa Dumanjug lakip na niini ang kapolisan sa lungsod ang gipaubos sa drug test sa Cebu Provincial Anti-Drug Abuse Council ug Philippine Drug Enforcement Agency (PDEA) kagahapon sa buntag.
Si acting mayor Efren Gica mibutyag nga sa maong gidaghanon 87 niini ang mga kawani sa munisipyo nga pulos regular nga kawani ug lakip usab siya nga nagpaubos sa drug test.
Usa sa mga kawani ang ipaubos sa imbestigasyon human kini miangkon nga tiggamitan siya og ginadiling drugas apan nihunong na siya paggamit niini sa nakalabay nga bulan.
Matud ni Gica nga sulod sa tulo ka buwan niya’ng paglingkod isip mayor sa lungsod mapasigarbohon siya nga ang Dumanjug “drug free” kini.
Sumala pa niya , 99.9 porsiyento siyang nakasiguro nga walay mga namaligya og ginadiling drugas sa lungsod tungod sa subsob ang ilang kampanya batok niini.
Si Gica miawhag sa mga kawani sa munisipyo nga seryosohon ang kampaniya batok sa ginadiling drugas ug gidasig ang katawhan nga motabang sa kampaniya batok sa ilegal nga drugas aron magpadayon nga drug free ang Dumanjug.(BANAT NEWS)