Libreng bunyag sa pista sa San Roque, Carcar City
CEBU, Philippines – Libreng bunyag para sa mga batang wala pa mabunyagi sa Sakramento sa Bunyag sa Romano Katoliko diha sa San Roque Parish sa Brgy. Valladolid sa dakbayan sa Carcar karong adlaw nga Sabado, Agosto 15, ning tuiga.
Kini kabahin sa mga giandam nga kalihokan alang sa pagsaulog sa ilang ika- 40th nga kapistahan sa parokya.
Matud pa ni Fr.Ver Pedrano, dako kaayo ilang pasalamat kung moabot og usa ka gatos ka mga kabataan ang magpabunyag. Sumala pa ni Pedrano ang kawalay kwarta maoy sagad nga rason sa mga ginikanan kun nganong wala nila pabunyagi ilang mga anak.
Tungod niini, nakahunahuna ang parokya nga librehon na lang ang bunyag isip pahalipay sa kapistahan sa ilang patron. Dugang pa ni Pedrano, nakita niya ang kaayohan sa libreng bunyag. Matud niya usa sa mga rekisitos sa pagpakasal mao ang bunyag sa mga kaslunon.
Ang kura paroko sa Valladolid nibutyag nga dili lang karong kapistahan sila modalit niining libreng bunyag. Matud niya, kadtong buot nga magpabunyag apan way kwarta mahimong moduol sa ilang buhatan aron matabangan. Alang ni Pedrano kinahanglang tabangan sa parokya kadtong nagkinahanglan bisan og walay ikabayad ngadto sa simbahan.
Kahinumduman nga si Archbishop Jose Palma, pangulo sa Artsidiyosisis sa Sugbo nipahinumdom sa mga kaparian nga kanunay mopahigayon og buhat sa kalooy ilabi na sa mga kabos sama sa libreng bunyag, libreng kasal og libreng misa sa patay. – /EIM) (BANAT NEWS)
- Latest
