CEBU, Philippines – Duha ka mga polis sa dakbayan sa Carcar ang giparelibohan sa ilang katungdanan aron ipaubos sa imbestigasyon tungod sa pasangil nga dili maayo ang relasyon sa duha. Ang duha ka mga polis naila nga sila si Senior Police Officer 2 Jose Repompo ug Police Officer 3 Nelson Mendaros pulos nadestino sa Carcar Police Station.
Matud pa ni Senior Superintendent Noel Gillamac, hepe sa CPPO, ang hepe sa kapulisan sa Carcar nga si Supt. Teofilo Manatad nagkanayon nagkabikil ang duha niini ka mga sakop.
Gimando usab ni Gillamac ang pag-imbestigar sa report nga iyang nadawat nga duna’y mga polis sa maong siyudad nga anha mag-estambayan sa balay sa gidudahang tigpayuhot og drugas.
Mismo ang mayor sa dakbayan sa Carcar Mayor Nicepuro Apura nga nahinabi sa mga tigbalita miingon nga gusto niyang palagputon gikan sa iyang dakbayan ang mga polis nga nalambigit sa maong alegasyon.
Sumala pa ni Apura nga duna’y impormante nga miduol kaniya ug mipahibalo kabahin sa maong binuang.
Gisubay karon kun duna bay koneksyon ang panagbingkil sa duha ka polis sa impormasyong nadawat sa mayor.
Ang duha girekomendar sa ilang hepe nga madestino una sa holding unit sa CPPO samtang nagpadayon ang imbestigasyon. – /EIM) (BANAT NEWS)