Pari ug mga kaubanan gireklamo sa residente

CEBU, Philippines – Pipila ka mga residente sa lungsod sa Tabogon ug Borbon ang mireklamo gumikan sa pagtunga sa grupo sa usa ka nagpailang pari nga mopahigayon og Santos nga Misa sa mga panimalay.

Ang gireklamo diha sa Borbon Police Station mao si Zosimo Enricoso o mas naila sa tawag nga Apo Elmo De Siena, 51, minyo ug trabahante sa usa ka hotel. Matud pa ni Margarito Ornopia, traffic officer sa Borbon ug maoy nibarog nga reklamante, nakadawat siya’g reklamo sa mga residente bahin sa nagpailang pari nga   nagmisa sa pipila ka mga balay. Apan nahibulong sila kay tinuod pareho kini og gipanggamit sa kagamitan sa pari, apan nabantayan nila ang kalainan pamaagi niini sa pagmisa.

Tungod niini, gisitar ni Ornopia si Enricoso ug gipangitaan og papeles sa gimaneho niining motorsiklo apan nagdumili kini paghatag sa mga dokumento hinungdan nga giimbitar kini diha sa presinto.

Sumala pa ni Ornopia, ang grupo ni Enricoso gilangkoban sa 14 ka mga tawo lakip mga bata diin mga babaye maoy unang moadto sa panimalay nga magdala-dala sa imahen sa Birhen ug mohangyo sa tagbalay nga dili balibaran ang ipahigayong Santos nga Misa sa ilang balay.

Hinuon pag-abot sa presinto, ayha pa nipakita sa iyang dokumento sa motor si Enricoso maong gibuhian kini sa mga polis.

Gusto ni Enricoso  makigtagbo sa tulo ka mga kura paroko sa St. Martin de Porres sa Ilihan, Tabogon; Conversion of St. Paul Parish sa Logo,  Borbon ug sa San Sebastian Parish sa Borbon karong adlaw nga Domingo aron tukion ang iyang kalihokan.

Samtang si Brgy. Kapitan Richard Antigua sa Brgy. Don Gregorio Antigua nibutyag sa Banat News nga dili g’yud pari iyang tan-aw ni Enricoso bisan nagsul-ob pa kini og sotana o abito.

Gihulagway pa niya kini nga arogante dihang giimbitar sa barangay hall niadtong Hulyo 27 tungod sa reklamo sa mga molupyo sa pagpamugos niini pagpahigayon og misa sa Sitio Canlagang 2 nga sakop sa iyang barangay.

Apan si Enricoso sa iyang bahin dihang nahinabi sa Banat News miinsister nga dili siya peke tungod kay naordinahan siya sa Apostolic Catholic Church ug duna siyay mga dokumento nga gihuptan nga pagmatuod niini.

Dugang pa niya ang iyang tahas mao ang pagpabalik sa mga tawo ngadto sa sabakan sa Ginoo.

Naghandum siyang hangpon silang kaparian sa Sugbo  sama sa pagtratar  kanila didto sa Luzon.Matud niya dinhi sa Sugbo gihulagway niyang "mga seloso ang pari."

Matud niya dili siya angay mangayo og pagtugot kay dili man siya sakop sa Simbahan sa Romano Katoliko.

Ang tigpamaba sa Archdiocese of Cebu Msgr. Joseph Tan nibutyag sa Banat News nga wala pa sila nakadawat sa maong reklamo, apan dili kini bag-o kanila.

Matud niya dili sa ingon nga giilad sa maong grupo ang katawhan apan ang gikwestyon lamang niya mao ang pagsayon-sayon sa maong grupo sa kabalaan sa sakramento aron makakwarta. Tungod sa mga reklamo gikatakdang tukion sa mga kaparian ug sa board of consultors ang paghimo og imbestigasyon ug kung masuta nga pangilad lamang kini, ayha pa sila mopadala og mensahe sa publiko nga di angay motuo sa maong grupo. – /EIM) (BANAT NEWS)