DOH, Kapitolyo ug VSMMC maghiusa
CEBU, Philippines – Ang kagamhanan sa probinsiya, Vicente Sotto Memorial Medical Center (VSMMC) ug Department of Health (DOH) nagpirmahanay kagahapon sa buntag sa Memorandum of Agreement (MOA) kabahin sa hospital modernization program alang sa kauswagan sa panglawas.
Si Bokal Peter John Calderon, chairman sa committee on health sa hunta probinsiyal nagkanayon nga duha ka MOA nga ilang gilagdaan mao ang consignment sa probinsiya sa mga tambal sa VSMMC ug ang implimentasyon sa programa sa DOH nga “Kapit Bisig para sa Kalusugan Pangkalahatan”.
Apan samtang wa pa mahitsas sa probinsya ang sistema sa pagpamalit og tambal aron i-consign diha sa VSMMC, mosakay lang una sila sa medicine consignment sa VSMMC.
Ang magamit nga mga tambal mao lang ang bayaran sa probinsiya ug kadtong mga ma-expire nga wala magamit iuli kini ngadto sa supplier.
Ang kagamhanan sa probinsiya migahin og P20 milyones nga budget alang sa mga tambal.
Sa wala pa ang maong MOA ang probinsiya maoy direktang namalit og tambal human sa bidding. Samtang sa laing parti sa hospital modernization mao ang exchange training program sa doktor diin ang probinsiya mopadala og mga doktor ngadto sa VSMMC aron magpaubos sa training.
Ang VSMMC mopadala usab og mga doktor ngadto sa mga tambalanan sa probinsiya aron sila maoy mo-augment sa mga staff.
Sa “Kapit Bisig para sa Kalusugan Pangkalahatan,” magtinabangay ang maong tambalanan sa DOH sa outreach programs sama sa medical, dental ug surgical missions. – /EIM) (BANAT NEWS)
- Latest
