Libud-suroy wa ikauwaw sa LGUs-Palma

CEBU, Philippines – Gidepensahan ni Cebu Archbishop Jose Palma ang mga local government units kabahin sa kampanya nila paghipos sa mga libud-suroy sa kadalanan nunot sa nagsingabot nga Asia Pacific Economic Cooperation (APEC) Summit ug sa International Eucharistic Congress (IEC) 2016.

Ang Cebu City maoy usa karon sa dayag kaayong nikampanya paghipos sa mga libud-suroy  ilabi na niadtong mangatulog daplin sa dalan.

Pila na lang ka adlaw ang paabuton magsugod na ang APEC meeting dinhi sa Sugbo hinungdan subsob na ang gihimong pagpangandam sa mga komitiba ug mga Local Government Unit (LGU's) pagsiguro nga mahimong malampuson kini. Karong Agosto 14 sugdan sa Cebu City ang paghipos kanila nga gitawag usab nilang “rescue operation” aron sila ibutang sa usa ka lugar diin sila maatiman ug ang uban tabangang makapauli sa ilang mga probinsya pinaagi sa “Balik Probinsya” program sa siyudad.

Ang APEC summit himoon karong Agosto 22 hangtod na sa Septiyembre 11 samtang Enero 24 hangtud sa 31 sunod tuig mahitabo ang International Eucharistic Congress dinhi sa Sugbo.

Gihulagway ni Palma nga ang gihimo sa gobiyerno maisip nga pagtabang  sa mga kabos sa katilingban ilabi na niadtong mga walay panimalay.

Ug alang kaniya, wala gikauwaw ug dili kini usa ka pagtago sa tinud-anay nga kahimtang sa nasud gikan sa mga mata sa mga langyaw’ng delegado kondili paghatag kini kanila og hustong pagtagad.  – /EIM) (BANAT NEWS)