Lalaki nagduwa’g armas nakaigo og bata

CEBU, Philippines - Grabeng naangol ang 13 anyos nga batang lalaki dihang aksidenteng napusilan sa iyang silingang giingong nagduwa-duwa og armas diha sa District 4, Barangay Pulpogan, lungsod sa Consolacion sa miaging gabii.

Si Police Officer 1 Ritchie Guilleran sa Consolacion Police Station miila sa biktima nga mao si Romuel Caballon, 13,  nagpuyo sa maong dapit, samtang gipangita pa karon ang suspek nga naila lang sa pangalang Erwin.

Matud pa nga gipatuyok-tuyok sa suspek sa iyang tudlo ang armas nga kalibre .38 apan kalit kining nibuto ug naigo ang biktima sa iyang abaga samtang nagbarog didto sa unahan.

Daling gidala sa Eversely Child Sanitarium Hospital sa dakbayan sa Mandaue ang bata samtang daling miikyas ang suspek.(Romeo Limpangog/EIM)(BANAT NEWS)