CEBU, Philippines - Nagluhod ug gi-ulo sa pagpusil atubangan sa iyang anak ang usa ka gitumbok nga lider sa mga banggiitang guns for hire dinhi sa dakbayan sa Sugbo diha sa Tupaz Street, sa Brgy. Pasil sa dakbayan sa Sugbo kagahapon sa alas-2 sa hapon.
Ang biktima naila nga si Arnel Gomez, 38, ug naila sa iyang alyas nga “Budlat” nga nagpuyo sa Panganiban Street, Brgy. Pahina Central ning dakbayan sa Sugbo.
Dili mominos tulo ka bala ang milubong sa ulo ni Gomez nga nakabsan sa iyang kinabuhi.
Sumala pa ni Police Officer 1 Ramil Bilocura sa Homicide Section sa Cebu City Police Office nga nahinabi sa Banat News angkas sa biktima ang iyang gamay nga anak. Apan pag-abot sa maong lugar kalit kining gibanggaan sa usa ka kotse hinungdan nga kini nalukapa sa dalan.
Duha ka gunman nga nag-atang daan sa maong dapit ang miduol ni Budlat ug dayon pusil kaniya sa makadaghang higayon.
Apan dunay duha ka mga polis nga beat patrols nga nakadestino sa maong dapit ang nakaresponde hinungdan sa nahitabong ginukoray apan wala na maapsi pa ang mga mamumuno.
Narekober sa mga polis sulod sa usa ka balay diin nanulod ang mga gunman ang duha ka .45 caliber pistols apan wa na sila didto hangtod nga nakasibat.
Dunay usa nga nakakita sa hitabo ang mitug-an nga miluhod pa si Gomez atubangan sa gunman nga daw nagpakiluoy sa iyang kinabuhi sa wala pa kini gibuk-an sa ulo.
Ang hepe sa City Intelligence Branch (CIB) sa Cebu City Police Office, Supt. Romeo Santander nga nahinabi sa Banat News miingon nga sa kamatayon ni Budlat daghang mga dagkong kaso sa pagpatay dinhi sa dakbayan ang nasulbad.
Si Budlat mao ang suspek sa pagpatay kang Jaime Blas Villaceran nga taga Brgy. Lorega San-Miguel nga gibanhigan sa dalan Colon niadtong Hulyo 13, 2015 gikan kini naghatod sa iyang mga anak sa tunghaan sa maong dapit.
Sigun pa ni Santander nga si Budlat nalakip sa “Top 5 persons of interest in anti-criminality campaign” sa CCPO gumikan sa mga krimen nga gikalambigitan niini.
Matud ni Santander bisan sa kadaghan sa mga kasong si Budlat maoy gitumbok nga suspek, naglisod sila pagpasaka og kaso niini tungod kay mahadlok ang mga testigos nga mobarog batok ni Budlat.
“I hope makasabot ang publiko kung wala’y kaso si Budlat kay daghan mi og nakuha nga ebidensiya bahin niya base sa account sa mga witnesses kung naa’y mga patay, pero dili mo prosper ang mga kaso kay wala’y tesgtigos mopakita, mahadlok niya. So ini’g abot sa korte dismiss ang kaso,” sumala pa ni Santander.
Gitug-an ni Santander nga si Budlat mao’y sinaligang hitman sa usa ka dakong grupo sa sindikato sa drugas dinhi sa Sugbo ug kini maoy lider sa grupo sa mga hitmen sa maong sindikato.
Gawas sa pagkalambigit sa gun for hire, si Santander midugang nga nalambigit ‘sab sa ilegal nga negosyo sa drugas ang biktima.
Nagduda si Santander nga gibawsan si Budlat sa mga nabiktima niini, padayon pa karon ang CCPO sa pagtino kun si kinsa ang duha ka mga nipatay kang Budlat. (Jojo C. Ugdol/EIM)(BANAT NEWS)