CEBU, Philippines - Nipahigayun og usa ka city-wide clean-up drive ang kagamhanan sa dakbayan sa Mandaue nga giapilan sa kapin sa usa ka libo ka kawani sa City Hall.
Ang kalihukan kabahin sa pagpangandam sa Charter Day celebration karong Agosto 30.
Sayo sa buntag kagahapon nagtinabangay ang mga kawani sa City Hall sa paghipos sa mga basura nga nagkatag sa kadalanan.
Matud sa public information officer sa Mandaue City Hall, Roger Paller, ang clean-up drive gitumong kagahapong adlawa nga usa ka holiday tungod sa founding anniversary sa lalawigan sa Sugbo.
Usa ka memorandum ang giluwatan ni Mayor Jonas Cortes nga nag-awhag sa mga kawani sa pagtabang.
Dugang ni Paller nga gawas sa taga City Hall, lakip ang mga kawani sa mga national government offices sama sa Bureau of Jail Management and Penology, Bureau of Fire Protection, ug uban pa nga nagbase sa dakbayan ang nitabang sa kalihukan.
Ila’ng gihimo ang pagkuha sa mga sagbot, pagpananum og mga buwak ug kadto’ng mga kahoy nga dili mahulipan ila’ng gipul-ungan ug gipanindutan usab nila ang mga center islands.
Sigun pa ni Paller nga dili lang karong adlawa himuon ang pagpanglimpyo sa siyudad ug tinguha nila’ng himuon kini matag Sabado.
Nasayran nga gi-una og limpyo ang rota sa mga delegado sa Asia-Pacific Economic Cooperation (APEC) Meeting sama sa duha ka taytayan, UN Avenue, dalan Plaridel, MC Briones, Ouano Avenue ug A.C. Cortes Avenue diin sagad sa mga basura nga nakuha mga plastic bottles ug wrappers.
Awhag sa siyudad sa mga molupyo nga dili magpasagad og labay sa mga basura tungod kay mao kini naghatag og hugaw sa palibot ug mga pagbaha sa pipila ka mga dapit sa dakbayan. (BANAT NEWS)