CEBU, Philippines - Mopahigayun og re-routing ang Cebu City Transportation Office (CCTO) sa mga V-Hire nga mobiyahe sa habagatang bahin sa probinsya sa Sugbo.
Kini aron adunay kaugalingon nga rota ang mga V-Hire ug dili na magpataka og agi sa kadalanan sa dakbayan.
Matud ni CCTO operations officer Jonathan Tumulak nga dili na makasulod ang mga V-Hire sa downtown area aron maminusan ang huot sa trapiko.
Nihangyo ang mga drivers kang Mayor Michael Rama nga makaagi sila og mga tunghaan tungod kay sagad sa ila’ng mga pasahero mga estudyante ug trabahante.
Ang rota sa V-Hire karon nga gikan sa terminal nga nahimutang sa Compania Maritima moagi sa South Road Properties (SRP) paingon na sa ila’ng tagsa-tagsa ka destinasyon.
Samtang ang mga V-Hire nga padulong sa dakbayan sa Sugbo moagi sa N. Bacalso Avenue liko sa B. Aranas Extension ug dalan Tupas paingon na sa Magallanes ug D. Jakosalem ug liko sa M.C Briones lahos na sa terminal. (BANAT NEWS)