Host families sa IEC 500 pa

CEBU, Philippines - Mokabat na sa 500 ang host families nga puy-an sa ubang delegado sa International Eucharistic Congress sa Sugbo karong Enero 24 hangtud 31 sunod tuig.

Si Msgr. Ruben Labajo sa accommodation committee sa IEC nagkanayun nga 2,000 ka delegado ang ibutang sa mga host families diin matag host duha ka delegado ang ila’ng i-accommodate.

Matud ni Labajo nga nagkinahanglan sila og 1,000 ka host families.

Apan matud ni Labajo nga kung dili makaabot sa mao’ng gidaghanon, ipahibawo nila kini sa mga delegado.

Hinuon ang mga pamilya pa sa dakbayan sa Sugbo ug Mandaue ang gihangyo ug kung makuwangan moduol usab sila sa mga pamilya sa dakbayan sa Talisay ug lungsod sa Consolacion.

Hinuon gipang-andam na nila ang mga retreat ug seminar houses nga pwede’ng mapuy-an sa uban pa’ng delegado.

Matud ni Labajo barato lang kaayo ang bayad sa mga retreat ug seminar houses sa kantidad nga P300 matag adlaw ug lakip na niini ang pamahaw.

Ang pagboluntaryo isip host family may gisubay nga kwalipikasyon ilabi na sa safety sa mga delegado ug kalimpiyo sa balay.

Si Labajo nagkanayun nga duna sila’y himuong ocular survey sa balay.

Ang mga delegado kinahanglan usab adunay rekomendasyon gikan sa ilang mga Obispo nga pwede sila’ng temporaryo’ng moipon og puyo sa usa ka pamilya.

Kadto’ng mga delegado nga wala’y endorsement gikan sa Obispo dili kini dawaton sa komitiba.

Ang mga tag-iya sa mga condotel nipasalig usab nga dunay igahin nga mapuy-an sa ubang mga delegado.

Dugang ni Labajo nga 15,000 ka delegado ang gilauman nila’ng mosalmot sa IEC ug moabot kini pila ka adlaw una pa ang adlaw sa kalihukan.  (BANAT NEWS)