CEBU, Philippines - Duha ang patay ug usa ang nakalingkawas sa tinong kamatayon atol sa pagpamanhig kagahapon sa buntag diha sa Brgy Lawaan I sa dakbayan sa Talisay.
Nakalingkawas sa kamatayon ang usa ka babayeng negosyante nga si Ma. Luisa Lapinid apan patay ang igsuon sa iyang bana (bilas) nga si Lorna Lapinid ug ang ilang drayber nga si Fritz Cobong, ang duha dead on arrival sa Talisay City District Hospital.
Ang negosyanteng si Ma.Luisa gikatahong nanag-iya og usa ka farm sa Ormoc City, nalandig kini sa Talisay District Hospital apan gibalhin dayon sa usa sa mga pribadong tambalanan sa dakbayan sa Sugbo tungod sa samad pinusilan sa tiyan.
Naigo sa dughan si Lorna, samtang si Cobong naigo sa abaga apan milahos sa dughan niini.
Base sa nakuhang impormasyon sa Banat News, si Cobong kanhi police asset sa kapulisan sa Guadalupe Police Station.
Matud pa ni Superintendent Germano Mallari, hepe sa Talisay City Police duha ka wala mailhing lalaking sakay og usa ka motorsiklo ang nagsunod sa Nissan Sentra nga gisakyan sa mga biktima.
Apan dihang nimenor si Cobong tungod sa nilabang nga habal-habal gitaparan dayon sila sa nagsunod nga motorsiklo ug gipaulanan sila og bala sa sakay niini gamit ang KG-9 submachine pistol.
Matud sa mga polis, gihurot sa gunman ang usa ka magazine pagtira sa mga biktima dayong pasirit palayo sa lugar.
Si Mallari miingon nga si Ma. Luisa nagkanayon nga iyang gi-hire si Cobong nga magmaneho sa iyang sakyanan kay day-off man kini pagpamasahero sa taksi.
Nasayran nga gikan nanimba sa San Roque Parish Church sa Lipata, Minglanilla ang mga biktima ug padung unta sa Our Lady of Guadalupe Parish sa Guadalupe, Cebu City dihang kalit silang gibanhigan.
Usa sa gitutokang anggulo sa imbestigasyon mao ang negosyo sa biktimang si Ma. Luisa.
“Atong gitan-aw ani business tungod sa mga resibo sa padala nga dagko og amount ug naa sad ni siyay farm,” matud pa ni Mallari.
Narekober sa kapulisan sa crime scene ang 14 ka basiyo sa 9mm nga bala.
Nabantayan ‘sab ni Mallari nga mga professional ang mga gunmen.
Gisubay karon ang mga establisamento sa crime scene nga posibleng nakakuha og footage sa ilang close circuit television (CCTV) cameras aron mas madali ang pag-ila sa mga mamumuno. (BANAT NEWS)