CEBU, Philippines - Gipasakaan na og kasong theft ang siyam ka mga nadakpang sakop sa Salisi Gang nga nadakpan sa dakbayan sa Mandaue niadtong nakalabay nga adlaw.
Ang grupo mihasi sa Metro Cebu sud sa pipila ka semana ug daghan silang nabiktima gikan sa dakbayan sa Lapu-Lapu, dakbayan sa Sugbo ug dakbayan sa Mandaue. Ang grupo nasipong diha sa ilang hideout sa Brgy. Lamac, sa lungsod sa Consolacion human ang usa nila ka kauban nadakpan sud sa usa ka mall sa Mandaue City.
Si Chief Inspector Michael Anthony Bastes, hepe sa IDMB mibutyag nga ang unang mipasaka og kasong theft mao ang Japanese nga ilaha untang biktimahon nga si Hiroshi Hirasaw nga usa ka Jiu Jitsu Instructor. Ang mga suspetsado mao sila si Jamboy Tagom, Jody Lasong, Jomar Balwa, Ceimploicio Conde, Edna Garcua, Rosaly Gerudius, Jonar Alodria, Arnold Losarito ug Mary Ann Abrasaldo.
Gawas sa maong Hapon, positibo usab nga giila ang mga suspek sa lain pa nilang mga nabiktima nga daling miadto sa Mandaue City Police Office aron pagtumbok kanila. Apil niini ang asawa ni kanhi Cebu City councilor Joey Daluz nga si Sheila Mae Daluz nga gikawatan og P120 mil sud sa iyang sakyanan sa niaging semana diha sa Brgy. Sto. Niño sa dakbayan sa Sugbo. (BANAT NEWS)