CEBU, Philippines - Gikan sa probinsiya sa Sugbo ang suplay sa semilya alang sa artificial insemination (AI) sa mga baka ngadto sa Philippine Carabao Center ug sa National Dairy Authority sa Visayas ug Mindanao.
Matud sa hepe sa Provincial Veterinary Office (PVO), Dr. Mary Rose Vincoy, nga naguba ang planta sa PCC ug NDA hinungdan nga sa Sugbo gikuha ang suplay.
Gawas niini, ang probinsiya nagsuplay usab sa 45 ka lokal nga kagamhanan sa probinsiya sa Bohol, Siquijor, Negros Oriental, Occidental ug Iloilo.
Ang probinsiya sa Sugbo mao lang ang may Provincial Liquid Nitrogen Plant sa tibuok Pilipinas diin ipundo ang mga semilya sa baka nga makuha.
Ang mga semilya i-inject ngadto sa kinatawo sa baka nga baye kinsa nanguwag na aron kini magsabak bisan og wala’y laki nga mohabal.
Dugang ni Vincoy nga 60 ngadto sa 80 porsiyento nga molampus ang IA. Ang mga mag-uuma sa kalungsuran makadaginot sa mao’ng pamaagi tungod kay hatagan kini og libre nga semilya ug libre usab ang serbisyo sa AI technician kaysa moabang pa og turo o laki nga baka.
Ang mga mag-uuma moduol lang sa mga AI technician sa ila’ng lungsod. (BANAT NEWS)