Taga V-1 Talamban tiyabaw sa baha

CEBU, Philippines – Nitiyabaw na sa baha ang mga residente sa V-1 Communities sa Nasipit, Talamban, dakbayan sa Sugbo.

Matud ni Joven Opolontesima nga dugay na kaayo sila’ng nag-antus sa baha ug daghan na kaayo’ng tigum ang gipahigayun apan hangtud karon wala gihapon nahatagi og kasulbaran.

Halos ang mga residente magbotas na lang aron makaagi sa baha nga lugar nga luwas sa hugaw ug baho nga tubig.

Si Konsehal Dave Tumulak, pangulo sa Cebu City Disaster Risk Reduction and Management Office, personal nga nisusi sa lugar ug nakita nga lisud ang lugar kung igo ra pasuyupan ang tubig kay wala’y labayanan ug gawsanan ug posible’ng magbalik-balik ra ang tubig.

Iya’ng girekomendar nga kinahanglan susihon sa engineer ug tun-an pag-ayo kung unsa’y kasulbaran tungod kay dugay na’ng panahon nga nahimo kini’ng pundohanan og tubig ang lugar.

Dugang ni Tumulak nga angayan usab magtagbo ang duha ka siyudad sa Sugbo ug Mandaue aron tukion ang problema.

Sa niagi’ng buwan nagtagbo ang mga sakop sa Banilad-Talamban-Cabangcalan Drainage Committee  nga gipangulohan ni Fr. Peru Dayag sa University of San Carlos aron pagtuki sa problema.

Gihangop ni Dayag ang suporta sa mga kompaniya nga mohatag og kaagian sa tubig sa higayun nga mahuman na ang plano sa lugar ubos sa pagtinabangay sa duha ka siyudad.

Panghinaut ni Peru nga sa dili pa ang eleksiyon sunod tuig mahatagan na og kasulbaran ang problema. – /GMR) (BANAT NEWS)