Gialarma sa armas may shabu
CEBU, Philippines – Gialarma sa kapolisan nga armado’ng lalaki sa sitio Baha-Baha, Hagnaya, San Remigio niadto’ng Domingo sa buntag nakuhaan usab og shabu.
Si Police Officer 2 Herman Bulawit sa San Remigio Police Station niila sa nadakpan nga si Edilberto Seguran Collantes, 39-anyos, nagpuyo sa mao’ng dapit.
Matud ni Bulawit nga usa ka nagpakabana’ng molupyo ang nakasigpat kang Collantes nga naglingkod nga nisiwil sa kilid ang giluklok nga armas. Naabtan sa kapolisan ang suspek hinungdan nga dali nila’ng gisita.
Napakyas si Collantes sa pagpakita og mga papeles nga momatuod nga legal ang pagdala sa armas hinungdan nga gisakmit.
Diha’ng girekisa, nakuha ang tulo ka pakete’ng shabu.
Samtang nadakpan usab sa Pulpogan, Consolacion ang usa ka tawo nga namalit og shabu ala una pasado sa niagi’ng Domingo sa kadlawon.
Ang nadakpan mao si Cañeca Abasolo, 39, taga Jagobiao, dakbayan sa Mandaue, kinsa nasakmitan og tulo ka gagmay nga pakete sa gituohang shabu.
Laing nadakpan mao si Vicente Getutua, 38, taga Mantawi Drive, Subangdaku sa mao’ng dakbayan nga nakuhaan og duha ka pakete’ng shabu sa buy-bust operation nga gihimo sa Presinto 2 sa Mandaue City Police Office (MCPO). – /GMR) (BANAT NEWS)
- Latest
