Tindahan sa mga merkado gipanglungkab

CEBU, Philippines – Mokabat sa kapin sa P100 mil nga kantidad sa salapi ang nadala sa kawatan gikan sa usa ka tindahan sa merkado sa dakbayan sa Carcar nga nadiskubrehan niadto lang nakalabay nga buntag.

Ang May Go Merchandise nga gipanag-iya ni May Go, 55, taga dakbayan sa Sugbo, ang biktima sa pagpanglungkab.

Gilimas sa kawatan ang P124, 482.00 nga cash nga gibutang sa cartoon box.

Wala’y close circuit television (CCTV) camera ang tindahan. Sulod sa crime scene nakuha sa kapolisan ang martilyo, screw driver, cutter ug usa ka sudlanan sa tubig nga gituohang iya sa kawatan.

Samtang gumikan sa kuha sa CCTV camera nailhan sa kapolisan ang duha ka suspek sa pagpanglungkab sa usa ka tindahan sa Mantalongon, lungsod sa Dalaguete pasado alas 3 sa nakalabay nga kadlawon. Ang mga suspek mao sila si Ricky Rodrigo, hingkod nga taga Mantalongon kauban ang usa ka 16-anyos nga taga sitio Tawi-tawi, Poblacion sa mao’ng lungsod. Sulod sa tindahan gikuha sa duha ka suspek ang salapi’ng cash nga P150,000.

Niadto’ng nakalabay nga adlaw ang minor de edad nitahan sa usa ka konsehal sa barangay dala ang P36,000 nga gituohang sobra sa kinawat nga kwarta.

Samtang nahanaw sab ang mahalong baligya sa usa ka tindahan sa dakbayan sa Bogo.

Si Senior Police Officer 4 Reynaldo Rosaceña sa Bogo City Police Station niila sa tindahan nga gilungkab nga mao ang Gud Moto Trading Inc. nga nahimutang sa Cantecson, Gairan.

Naglakip sa gikawat gikan sa steel cabinet ang nagkadaiya’ng matang sa mahalong relo de pulso.

Gibanabana nga mokabat sa P19,000 nga kantidad sa mga baligya ang nahanaw. – /GMR) (BANAT NEWS)