CEBU, Philippines – Wala’y pagsupak ang konseho sa dakbayan sa Toledo nga matukod sa Barangay Bato ang 150 Megawatt nga coal fired power plant nga makadugang sa ilang panginahanglan nga suplay sa kuryente.
Atol sa regular session sa konseho sa miaging semana, giduso ni Konsehal Ricardo Pepito ang resolusyon nga naghatag og pagtugot sa kompaniya pagpadayon pagtukod sa 150 MW coal fired power plant.
Base sa resolusyon nga giuyonan sa konseho, ang mga konsehal nagkauyon nga kun matukod na ang mao nga planta hayan dili na magkuwang ang ilang suplay sa kuryente.
Matud sa mga konsehal nga ang bag-ong planta sa kuryente nga mugnaon sa Barangay Bato dako og abag alang sa kalamboan sa siyudad sa Toledo ug sa mga silingan nga lungsod. – /RUB) (BANAT NEWS)