Langyaw nanghagis napusilan sa polis

CEBU, Philippines – Nalandig sa tambalanan ang usa ka langyaw nga giingong hubog human kini napusilan sa usa ka polis sa dihang kini nanghagis ug misuway og dunggab sa usa ka polis diha sa Brgy. Poblacion sa lungsod sa Santander niadtong Sabado sa hapon.

Ang langyaw naila nga si Dale Lane Dunbar, 55, duna’y ka live-in nga Filipina ug nagpuyo sa Brgy. Pasil sa maong lungsod, samtang ang polis nga nakapusil mao si Police Officer 2 Vergil Rosal sa Santander Police. Matud pa ni Senior Police Officer 2 Manuel Regulacion ang imbestigador sa Santander Police nga nahinabi sa Banat News gikan mitambong sa usa ka kombira sa silingang polis ang langyaw apan milakaw kini ug nagmaneho og motorsiklo padung sa Poblacion bisan hubog ug nanghagis sa usa ka tindahan og bugas ug nanghulga og kutsilyo. Lakip sa iyang gigukod og kutsilyo ang nirespondeng si PO2 Rosal hinungdan nga napusilan kini sa tiil. Apan bisan sa Oslob District Hospital gikatahong nanghagis gihapon ang langyaw hangtud gidala kini sa Holy Child Hospital sa dakbayan sa Dumaguete. – /EIM) (BANAT NEWS)