CEBU, Philippines - Usa ka 30-anyos nga lalaki ang nasakmitan sa polis og mga gikatahong shabu atol sa gipahigayon nga buy-bust operation sa Sitio San Isidro Labrador, Brgy. Basak sa dakbayan sa Lapu-Lapu.
Napaslak karon sa prisohan sa Police Station 4, si Bobby Gabatan nagpuyo sa maong lugar human nasakmitan og duha ka medium size packs ug pito ka gagmay nga putos sa gidudahang shabu atol sa maong operasyon.
Matud pa ni Police Inspector Alcon Ecusora moabot og P70 mil ang balor sa nasakmit nilang shabu gikan sa suspek ug P300 nga gituohang halin sa drugas ug ang P200 nga buy-bust money.
Sa laing bahin, mokabat sa P59 mil nga kantidad sa shabu ang nasakmit sa kapolisan sa Purok Nara, Tayud, Liloan gikan sa usa ka armadong lalaki nga nakuhaan usab og .9mm nga pistola.
Si Police Officer 3 Jesson Gayo sa Liloan Police Station miila sa suspek nga si Jesseper Capua, 38, nagpuyo sa maong dapit.
Si Senior Inspector Ramil Morpos maoy nakatubag sa maong alarma ug dihang ilang girekisa nakuha ang usa ka dakong putos nga shabu kang Capua lakip ang nahisgutang armas nga di lisensyado.
Samtang duha usab ang nadakpan sa Pitogo, Consolacion sa buy-bust operation nga gipangulohan ni Senior Inspector Wilson Abot.
Matud pa ni Police Officer 1 Reymond Lleve ang nadakpan mao sila si Warren Dimapi, 25, ug Norland Caminos, 20, pulos nagpuyo sa maong dapit ug nakuhaan og pito ka gagmay nga paketeng shabu.
Nadakpan usab sa Compostela Police ang usa ka Ricardo Esquerra, 52, nagpuyo sa Brgy. Estaca tungod sa reklamo ni Brgy. Kapitan Leonida Guc-ong nga nagtanom ang suspek og marijuana diha sa kaang sa iyang panimalay. (BANAT NEWS)