Nangawat og underwear gidakop

CEBU, Philippines - Nadakpan sa guard-on-duty sa usa ka tindahan sa Maguikay, dakbayan sa Mandaue ang usa ka tawo nga nanguha og mga underwear nga naglakip sa mga brief ug wala niagi sa kahera alang sa pagbayad.

Si Police Officer 2 Jay-R Gulabin sa Presinto 4 sa Mandaue City Police Office (MCPO) niila sa nadakpan nga si Raffy Gabonada, 32-anyos, taga sitio Pilit, barangay Cabancalan, sa mao’ng dakbayan.

Matud ni Gulabin nga dali’ng gialihan sa guwardiya sa paglabay sa pultahan ug gipangayoan sa resibo ang suspek apan wala nakapakita hinungdan nga gidakop ug gitugyan sa kapolisan.

Laing nadakpan sa kapolisan mao si Danilo Retable, 25-anyos, nga taga Mantuyong, sa mao’ng dakbayan nga nasakmitan og kalibre .38 nga wala’y lisensiya.

Si Police Officer 2 David Omambac sa Presinto 1 sa MCPO niingon nga nakadawat sila og taho labot sa armado’ng lalaki sa mao’ng lugar ug diha’ng ila’ng gisusi nasuta nga positibo hinungdan nga dali nila’ng gidakop ug gibilanggo ang suspek. (BANAT NEWS)