Way nangasakit sa gipurga dinhi sa CV

CEBU, Philippines - Way negatibong reaksyon o mga nahitabo atol sa gihimong pagpamurga sa mga sakop sa Department of Health sa Central Visayas nga kabahin sa ilang tinuig nga programang National School Deworming Day niadtong nakalabay nga adlaw.

Sukwahi kini sa nahitabo sa pipila ka mga lugar didto sa Mindanao diin dunay matud pa gatosan ka mga bata ang nangreklamo sa kasakit sa tiyan ug pagsuka human nitumar sa chewable nga purga sa samang adlaw. Matud pa ni Dr. Jonathan Neil Erasmo, Medical Officer IV sa DOH ug kasamtangang program coordinator sa maong programa adunay 1,310,112 ka mga estudyante ang Central Visayas.

Apan ang ilang target nga mapurga 1,113,598 lamang. Sa pagkutlo ning balita, 464,471 pa lang sa rehiyon 7 ang ilang napurga base sa naabot kaniyang report apan aduna pay nahibiling lima ka adlaw ang ilang mga sangang buhatan pagduso sa ilang mga reports.

Sumala pa ni Erasmo nag-una ang Mandaue City nga dunay daghang napurga nga niabot og 91.3 percent , gisundan sa Bogo City, Siquijor sa ikatulo.

Samtang ang Cebu City maoy pinakaubos nga porsiyento base sa talaan nga dunay 6.61 ug gisundan sa Naga City.

Naapektahan ang programa tungod sa balita nga expired ang tambal nga gipatumar sa mga bata didto sa Mindanao maong nangasakit ang mga tiyan ug nagsuka.

Ang maong balita daling nikatap pinaagi sa social media ug daghang mga ginikanan dayon ang wala motugot nga purgahon ilang mga anak diha sa mga eskuylahan.

Si Erasmo miklaro nga bag-o gayud ilang gigamit nga tambal sa pagpurga nga mao ang Alvendazol 400mg chewables nga mo-expire sa 2016 ug 2017 pa.

Dugang pa niya, niagi sa Food and Drug Administration Analysis nga luwas magamit sa mga bata ang maong medisina.

Dugang pa ni Erasmo natural ra gayud nga reaksyon sa matag tawo nga magpapurga nga maglain ang tiyan ug dunay magsuka, ilabi ug dunay daghan bitok sa tiyan.

Usa sa nakitang rason ni Erasmo nganong way nangreklamo, kini tungod kay posibleng menus kaayo ang mga bata adunay mga bitok dinhi tungod kay matag tuig duna man  pagpamurga sa DOH inabagan sa Department of Education.

Gani ang Facebook sensation nga si Daniel Cabrera usa usab sa napaubos sa deworming sa ilang eskuylahan sa Subangdako Elementary School miingon nga luwas ang maong tambal.

Ang magtutudlo sa Mambaling Elementary School Cheryl Fuentes Ebo, nibutyag sa Banat News way estudyante niya nga nireklamo human napurga. (BANAT NEWS)