Laglag Barya nakabiktima na ’sab sa parkingan
CEBU, Philippines – Bisan pa man sa hugot nga pagpatrolya sa kapolisan sa kadalanan, nakalusot gihapon ang grupo sa “laglag barya gang” kagahapon sa udto diha sa Legaspi Street, Brgy. Sto. Niño, Cebu City ug ang gibiktima mao ang asawa sa kanhi konsehal sa dakbayan.
Ang biktima mao si Sheila Mae Daluz, kapikas ni Atty. Joy Daluz. Sumala pa nadala sa mga kawatan ang P120 mil cash sulod sa iyang bag nga nadala sa kawatan.
Gawas sa salaping cash nadala sab sa kawatan ang mahalong selpon ug mga importanteng dokumento sama sa passport ni kanhi konsehal Daluz.
Sa pakighinabi sa Banat News ni Daluz kini miingon nga kauban niya ang iyang anak ug si Atty. Daluz aron mangaon sa usa ka kan-anan sa maong dapit.
Unang nanganaog ang kanhi konsehal ug ilang anak kay nangita og kaparkingan ang ginang, apan usa ka tawo ang mituktok sa bintana ug miingon nga duna’y nahagbong sa likod hinungdan nga iyang gisubay.
“Pagkabantay nako nga naay gitagak nga sinsilyo didto na ko nakahuna-huna nga ayay laglag barya ni. Paglingi nako wala na akong bag sulod sa sakyanan, kadiyot ra kaayo,” matud pa ni Daluz.
Niadtong hitaboa duna’y polis pipila lang ka metros gikan sa nahitaboan ug sa unahan dunay mga tanod nga nangaon daplin sa dalan, apan silang tanan wa makabantay kay way komosyon nga nahitabo.
Nakuhaan hinuon sa close circuit television (CCTV) camera ang duha ka lalaking nibiktima kang Daluz nga yano kaayong naglakaw palayo.
Apan dunay drayber sa jeep ang mihunong sa tungod sa mga polis ug miingon nga nakakita siya sa hitabo ug pito ka lalaki ang grupo apil ang usa ka bayot nga pulos nanakay gikan sa Brgy. Tejero nga wa gani nibayad og pleti ug gibaharan pa siyang buk-an og ulo. – /EIM) (BANAT NEWS)
- Latest
