Nagdala’g armalite gidakop
CEBU, Philippines – Armadong lalaki sa dalan M.C. Briones, Brgy. Subangdaku, dakbayan sa Mandaue nadakpan ug nakuhaan og usa ka Armalite rifle ug kalibre .22 uban sa mga bala niini.
Si Police Officer 2 Rusthy Bolotaulo sa Presinto 2 sa Mandaue City Police Office (MCPO) miila sa suspetsado nga mao si Eduardo Sendo, 59, taga Brgy. Pagsabungan sa maong dakbayan.
Matud pa ni Bolotaulo, usa ka molupyo sa Sitio Riverside ang nitawag kanila ug nipahibalo kabahin sa usa ka armadong lalaki nga daw dunay gipaabot diha sa ilang dapit. Sila si Police Officer 3 Isagani Garcia ug lima pa ka mga kauban ang dali nga miadto sa maong lugar ug ilang naabtan ang suspetsado nga nagbarog-barog sa daplin sa dalan.
Dihang ilang gisita wala kini makaalma ug nasakmit gikan kaniya ang usa ka Armalite rifle nga dunay duha ka magazine nga puno sa mga bala ug usa ka .22 kalibre nga mubo nga armas nga duna say mga bala apan wala’y papeles niini. Wa motug-an ang suspek kun unsay iyang tumong pag-estambay sa maong dapit. – /EIM) (BANAT NEWS)
- Latest
