Media Center sa IEC gibendisyonan

CEBU, Philippines - Gibendisyunan ni Cebu Archbishop Jose Palma ang Advertising and Print Media Office alang sa 51st International Eucharistic Congress (IEC).

Ang mao’ng buhatan nahimutang sa Highway Guizo, siyudad sa Mandaue diin himuon ang guide ug souvenir books diin maprinta ang inadlaw-adlaw nga kalihukan sa IEC nga tamdanan sa mga delegado lakip na sa mga dapit nga mahimo’ng bisitahon sa mga pilgrimage.

Pinaagi sa print and advertising, matud ni Palma nga ang katawhan masayud kun unsa gyud ang IEC.

Samtang si Father Joseph de Aquino, documentation head sa 51st IEC, niingon ang mga printed materials gihimo pinaagi sa pagpakigtambayayong sa University of San Carlos ug Clintkamms.

Ang mga nagtinguha nga mo-sponsor sa kalihukan moadto lang sa media office apan kinahanglan pa nga moagi sa buhatan sa IEC.

Samtang mokabat na sa P13 milyones ang natigum sa Archdiocese of Cebu sa Piso Para sa Misa ng Buong Mundo alang sa IEC.

Matud ni Fr. Charles Louis Jayme, national coordinator sa fund raising drive, nga padayun gihapon sila’ng nanawat sa mga remittance gikan sa Katoliko’ng Simbahan.

Malaumon si Jayme nga modaku pa ang donasyon tungod kay kutob sa Disyembre karong tuiga sila manawat sa ipanghatag nga donasyon ug ang mga dioceses nisanong usab sa ila’ng panawagan.

Ang kalihukan ipahigayun sa Enero 24 hangtud 31, 2016. (Decemay P. Padilla ug Rowena D. Capistrano/GMR)(BANAT NEWS)

Show comments