AWOL cop sakpan sa drug den

CEBU, Philippines - Nadakpan sa joint operation sa mga sakop sa City Intelligence Branch (IDMB) ug Investigation Detection and Management Bureau (IDMB) sa Mandaue City Police Office (MCPO) ang usa ka polis nga AWOL (absence without official leave) ug duha ka mga kauban lakip ang gidudahang drug pusher   sa usa ka drug den diha sa Sitio Talong, Brgy. Paknaan kagahapon sa buntag.

Si Senior Superintendent Mariano Natuel Jr., officer-in-charge sa MCPO miila sa nadakpan nga kanhi polis sa MCPO nga mao si Police Officer 1 Junibie Catarinin.

Matud pa ni Natuel, target sa operasyon si Antonio Marino Tomarong alyas Tony, 36, nagpuyo sa maong dapit.

Apan matud pang Natuel pagdakop kang Tomarong didto usab si PO1 Catarinin ug Celestino Manatad nga  giingong nag-repack og shabu.

Nakuha sa operasyon ang tulo ka medium size nga shabu, pito ka gagmay nga pakete niini, mga tinfoil, drug paraphernalia, usa ka armas nga kalibre .38 nga may tulo ka bala,  cellphone ug ang  buy-bust nga money P1,500.

Si Chief Inspector Michael Anthony Bastes, hepe sa IDMB sa MCPO miingon nga niadtong Enero niining tuiga gi-drop from rolls si Catarinin tungod sa pag-AWOL niini sukad sa 2014.

Matud ni Bastes nga si Catarinin usa sa mga polis sa MCPO nga gipaubos ni  Senior Superintendent Petronelli Baldebrin sa random drug test  ug napositibo kini, sukad niadto wa na kini mo-report sa trabaho hangtud nga gitaktak.

Drug den ni Lola

Samtang usa ka 69-anyos nga lola, kauban ang iyahang anak ug apo, ug laing upat ka mga tawo ang nasikop sa buy- bust operation sulod sa drug den sa Purok Dama de Noche, Brgy. Looc, dakbayan sa Lapu- Lapu sa miaging Miyerkules sa hapon.

Ang gidakop mao si Victoria Tampus, 68, kinsa giingong tag-iya sa drug den, iyang anak nga si Marlon Tesorio, 45, apo nga si Jocelyn, 31.

Laing nadakpan nga naabtan sulod sa drug den mao si Grace Rapada ug Jason Valiente, pulos 27 anyos, Cedric Jabal, 24, ug Finley Casul, 40, ug nagpuyo sa maong barangay.

Matud ni Police Senior Inspector Wilbert Parilla, hepe sa Gun-ob Police Station ilaha nang giguba kaniadto ang payag nga gihimong drug den ni Tampus kinsa nabantog sa alyas nga "Nanay" ug gipahimangnoan nga di na usbon.

"Wala namo usa siya gikasohan kaniadto for humanitarian reasons," matud ni Parilla, apan nakadawat siya og reklamo nga subling nibalik sa maong ilegal nga buhat si Tampus hinungdan nga ila kining gihimoan og operasyon.

Gikumpirmar ni Parilla nga moapil ‘sab og suyop si Tampus, gawas sa iyahang mga kauban.

Nakumpiska kanila ang 32 ka gagmay’ng putos ug usa ka medium size sa gituohang shabu nga mokabat og P50 mil ilabi na ang drug paraphernalia ug usa ka .22 caliber revolver.

Drug dens

Gipangguba sa Argao Police ang mga kubol-kubol nga gihimong drug den sa mga grupo sa mga drug pushers diha sa Sitio Sungka, Brgy. Jampang sa lungsod sa Argao atol sa ilang pagpangronda sa nakalabay’ng hapon.

Atol sa maong operasyon nasikop sa kapulisan ang usa ka John Rey Delos Reyes, 27, nga nagpuyo sa maong dapit nga naatlang nagpalit og shabu sa maong dapit.

Apan si Evan Puerto, nga maoy target sa kapulisan ang nakaikyas dala ang daghang shabu.

Matud ni Sr. Insp. Alejandro Batobalonos, hepe sa Argao Police nga nahinabi sa Banat News, usa ka level 2 drug pusher si Puerto apan nakaikyas kini human napalitan og usa ka paketeng shabu sa ilang police asset gamit ang P300. Upat ka mga tawo ang kauban sa suspetsado sulod sa drug den apan dali silang nakasibat padung sa kalibonan gawas lang ni Delos Reyes.

Sulod sa kubol kubol ug drug den nakita sa kapulisan ang dagkong mga pakete nga adunay lama sa gidudahang shabu. Nakuha diha sa dapit ang motorsiklo ni Puerto nga adunay  sud nga kalibre 45 pistola, unom ka paketeng shabu diha sa U-Box niini.

Ang drug den gipangguba sa kapolisan una pa sila namiya sa lugar. /EIM (BANAT NEWS)