Drayber sa Tejero adik

CEBU, Philippines – Drayber sa Brgy, Tejero, Cebu City nasakpang tiggamitan og ilegal nga drugas  human niguwa ang resulta sa gipahigayong drug test sa mga tinugyanan sa Cebu City Office on Substance Abuse Prevention kagahapon sa buntag.

Mokabat 80 ka mga trabahante ug lakip ang mga opisyal sa barangay ang nagpaubos sa drug test niadtong Martes.

Matud pa ni Dr. Alice Utlang, pangulo sa COSAP, nga nahinabi sa Banat News, magpaabot lang sila kung unsay buhaton sa mga opisyal sa barangay batok sa maong drayber.

Sugod niadtong Enero hangtod karon buwan sa Hulyo, miabot na og dose ka tawo ang nagpositibo sa walo ka mga barangay nga ilang napaubos sa drug test.

Ang maong mga barangay mao ang Zapatera, Pamutan, Cambinocot, Sambag 2, Basak Pardo, Kasambagan, Calamba ug ang ulahi ang Tejero.

Kasagaran sa mga nagpositbo mga loader, tanod, driver, sakop sa Lupon ug environmental officers.

Shabu ang kasagaran nga ilang gikabuangan. Si Brgy Captain Jessilou Cadungog sa iyang bahin nibutyag nga ang maong driver nga positibo usa sa iyang mga gisuspetsahan nga nalambigit sa ilegal nga drugas.

Sumala pa ni Cadungog ilang tukion sa konseho ang problema ug ila  kining ipaubos sa “We care program” sa COSAP isip tabang sa barangay ngadto sa maong driver.

Si Kagawad Gary lao sa iyang bahin malipayon nga usa ra ka tawo ang nagpositibo tungod kay upat ka mga tawo ang iyang gidudahang nalambigit niini. – /EIM) (BANAT NEWS)