CEBU, Philippines – Gibasura sa House of Representatives Electoral Tribunal (HRET) ang election protest nga gisang-at ni kanhi Pinamungajan mayor Geraldine Yapha batok ni Kongresista Gwendolyn Garcia sa ikatulong distrito sa probinsiya sa Sugbo.
Sa desisyon nga gipetsahan og Hunyo 8, 2015, ang HRET nga gipangulohan ni Supreme Court Associate Justice Presbitero Velasco Jr. niklaro nga si Garcia gyud ang nidaug sa pagka-kongresista sa eleksiyon sa Mayo 2013.
Gani sa gihimo’ng revision ug appreciation sa 25 porsiyento sa mga giprotestahan nga mga balota, ang orihinal nga labaw ni Garcia nga 1,984 nadugangan og 291 ug nahimo na nga 2,275.
Si Yapha niadto’ng Hunyo 30, 2015 niduso og mosyon sa pagsibog na lang sa kaso gumikan sa kalangan samtang pipila na lang ka buwan ang umaabot eleksiyon sa 2016.
Matud ni Yapha nga wala nagpasabot nga nidawat na siya sa kapildehan batok ni Garcia.
Buot lang ni Yapha nga magamit ang iya’ng kwarta ug oras sa pagserbisyo sa katawhan sa distrito lakip na ang pagpangandam sa umaabot eleksiyon.
“The Decision of the HRET dismissing Yapha's Protest renders moot Yapha's withdrawal, and clearly affirms Congresswoman Garcia's victory and proclamation as the duly elected representative of the Third District of Cebu,” matud sa abogado ni Garcia nga si Atty. Tranquil Salvador.
Ang ikatulong distrito gilangkuban sa dakbayan sa Toledo ug mga lungsod sa Asturias, Tuburan, Balamban, Barili ug Pinamungajan nga may kinatibuk-ang botante nga 305,952 sa niagi’ng eleksiyon. (BANAT NEWS)