CEBU, Philippines - Namatay ang usa ka 42-anyos nga amahan human nahutdan og dugo diha’ng gipusil kini sa iyang anak didto sa Sitio Katsilaan Bato, Barangay Ermita ning dakbayan sa Sugbo sa miaging gabii.
Ang biktima nga buwag sa asawa, usa ka kargador ug namasahero usab og traysikad sa maong lugar, samtang ang nipusil kaniya mao ang iyang anak nga 16 anyos.
Matud pa ni PO1 Joel Zamora sa Homicide Section sa Cebu City Police Office nga nasuko ang anak ngadto sa amahan kay dili siya palaagon aron pakatulgon og sayo.
Niana’ng lawom na ang kagabhion migawas ang biktima aron mamasahero ug mangarga sa Carbon Market apan giatangan kini sa iyang anak nga nagpahipi sa ngitngit ug dayon gipusil.
Ang biktima naigo sa tuhod ug nagtakiang nga nidagan palayo ug mitago sa kahadlok nga siya tiwasan.
Milanat pa og mga usa ka oras usa kini makit-i sa iyang mga silingan ug luya na kaayo nga gidala sa Cebu City Medical Center (CCMC) apan namatay kini kay nahutdan og dugo.
“Nagtago man gud ni siya og maayo kay nahadlok tawon nga sundan unya tiwasan. Kun nakuha ni og dali mabuhi pa unta siya, namatay kay nahutdan og dugo,” matud pa ni Zamora.
Human sa pagpamusil paspas sab kaayo nga misibat ang anak nga padayon pa nga gipangita sa kapulisan. (BANAT NEWS)