CEBU, Philippines – Nalipay si Talisay City Mayor Johnny Delos Reyes sa gipakita’ng labok sa bag-ong hepe sa kapolisan nga si Superintendent Germano Mallari human nasikop ang duha ka bigtime pusher.
Kini ang hinungdan nga gihatagan ni Delos Reyes og P15 mil si Mallari isip token sa kalampusan sa kapolisan.
Nalipay si Delos Reyes sa gipakita’ng labok ni Mallari gumikan kay sayo kini’ng nakapakita sa maayo nga performance ug wala siya nasayop pagpili niini.
Matud ni Mallari nga igo lang siya nagtamud sa gipanumpaan nga trabaho.
Gipahibawo ni Mallari nga magpadayun gihapon ang ilang kampanya batok ilegal nga kalihukan sa Talisay ug giawhag ang publiko nga motabang sa pagtaho sa mga kasikas sa ilang dapit aron kini masumpo.
Si Delos Reyes nipahibawo nga hurot na ang iyang pundo sa intelligence funds hinungdan nga personal niya nga kwarta ang gitunol sa gipasidunggan nga mga polis.
Gipasakaan na og kaso sa piskaliya ang dinakpan nga sila si Sulpicio Briones Bacaco ug Elmer Gasalatan. – /GMR) (BANAT NEWS)