Bantay Dagat sa Mandaue molihok na

CEBU, Philippines – Magsugod na sa ilang operasyon ang gitukod sa dakbayan sa Mandaue nga Bantay Dagat human sa ilang pagpanumpa sa katungdanan ug pagsubo sa patrol boat nga kantidad og P1.4 milyones.

Si Konsehal Jimmy Lumapas, chairman sa committee on agriculture sa konseho, niingon nga ang suliran sa ilegal nga pagpanagat gipadangat sa iyang buhatan.

Kini ang hinungdan sa gipalabang nga ordinansa sa pagmugna sa Bantay Dagat lakip na ang pagpangita og pundo nga maoy gipalit sa patrol boat.

Si Luis Bontuyan, presidente sa Bantay Dagat federation, niingon nga matag barangay nga nahimutang daplin sa kadagatan adunay gitukod nga kahugpungan sa mga mananagat.

Kini gilangkuban sa 250 ka mananagat sa Labogon, 60 sa Paknaan, 100 sa Umapad, unom sa Opao, 80 sa Looc, unom sa Basak ug 100 sa Jagobiao.

Gitawag og Mandaue City Bantay Dagat Association ang grupo.

Naglakip sa mga ilegal nga panagat nga naglihok sa kadagatan sa dakbayan ang liba-liba ug mga pumpboat nga moagi nga magguyod og pukot nga gagmay ang lungag.

Naggamit sab og compressor ang pipila ka mananagat nga molabay sa kadagatan sa dakbayan ug adunay manglabay og dinamita ug may pagpanghilo pa sa mga isda pinaagi sa paggamit og kemikal.

Si Rolando Tero, City Agriculturist, nipadayag nga gikan sa laing dapit ang mga mananagat nga mosulod sa kadagatan sa dakbayan nga mogamit sa ilegal nga pagpanagat.

Naglakip na niini ang mga mananagat gikan sa dakbayan sa Talisay, Consolacion ug dakbayan sa Lapu-Lapu. – /GMR) (BANAT NEWS)