CEBU, Philippines – Wala nakahuman og tambong sa graduation program sa iyang anak ang amahan nga usa sa mga “most wanted persons” sa lungsod sa Medellin.
Gisikop sa kapolisan si Danilo Dumaguit alyas Danny, 39, tapasero og tubo nga taga Caputatan Norte, Medellin atol sa graduation sa Caputatan Norte Elementary School pasado alas 7 sa nakalabay nga gabii.
Si Police Officer 1 Rosano Queddeng sakop sa alert team sa Medellin Police Station nitug-an nga usa sa ilang assets ang nakatug-an nga nasigpatan sa maong lugar si Dumaguit kinsa may kaso’ng murder.
Niadto pa’ng 2006 nalutsan og warrant of arrest si Dumaguit ug nalista isip ika-walo nga most wanted person sa lungsod sa Medellin.
Tayming nga nalingaw og tan-aw si Dumaguit sa pagsayaw sa iyang anak ug kini gituparan sa mga polis ug gipahibawo nga kini ila’ng dakpon.
Kuyog sa akusado nga nitambong sa graduation program sa kinamaguwangan nga anak babaye ang grade 3 ug grade 2 nga mga anak nga babaye.
Usa sa mga anak ni Dumaguit igo lang nihilak ug nangutana kung ngano’ng gidakop ang ilang amahan.
Ang mga polis nipasabot nga dunay kaso ang ilang amahan.
Sulod sa prisohan hugot nga gihimakak sa akusado ang pasangil ug gani wala siya nagtagotago. – /GMR) (BANAT NEWS)