Garcia nangita sa desisyon sa PB

CEBU, Philippines – Gikwestiyon ni Dumanjug Mayor Nelson Garcia ang notice of decision sa iyang kaso nga giluwatan sa secretary sa Sangguniang Panlalawigan.

Matud sa amahan ni Garcia, Atty. Pablo Garcia nga ang tibuok hunta probinsiyal ang modesisyon ug mopirma sa desisyon sa kaso.

Kini ang hinungdan nga ila’ng gipangita ang pinirmahan nga desisyon sa hunta probinsiyal sa pagsuspenso sa mayor sulod sa unom ka buwan.

Matud ni Garcia nga ang gihimo sa hunta probinsiyal mao ang resolusyon nga nag-aprobar sa report sa committee on complaints and investigation sa pagsuspenso sa mayor.

Kini kalapasan sa Section 66 sa Local Government Code, sumala pa sa kanhi gobernador ug kongresista.

Ang balaud nagmando sa paghimo og desisyon nga sinuwat sa kaso nga giimbestigar sa sanggunian ug ipadayag ang mga rason sa nakab-ot nga deisyon.

Ang mga Garcia nibahad nga mohimo og legal nga lakang sa giingong nahimo’ng kalapasan sa mga sakop sa hunta probinsiyal. – /GMR) (BANAT NEWS)