Seguridad sa Semana Santa gihugtan
CEBU, Philippines – Nilibot sa mga bus terminals, pier ug simbahan ang officer-in-charge sa Cebu City Police Office aron pagsusi sa seguridad nga gitagana alang sa Semana Santa.
Si Senior Superintendent Mariano Batiancela nisusi sa Cebu South Bus Terminal, Pier 1 ug sa Our Lady of Mt. Carmel kagahapon sa buntag.
Si Batiancela nagkanayun nga sugdan na sa kapolisan ang pagpahugot sa seguridad ilabi na karong Miyerkules ug Huwebes kung diin kadaghanan sa katawhan molarga sa ilang tagsa-tagsa ka probinsiya.
Matud niya nga ugma pun-an ang mga police personnel sa tugpahanan ug pabilin nga “full alert” sugod karon hangtud mahuman ang Semana Santa.
“Mao kini ang ato paninguha nga mahatagan gyud og seguridad ang ato mga kaigsuonan,” sigun ni Batiancela.
Samtang si Police Chief Inspector Enrique Belciña sa CCPO Police Community Relations wala’y hunong sa pagpahimangno sa katawhan nga magmabinantayon sa ilang kabtangan.
“Hangyo lang nato nga dili gyud biyaan ang ilang panimalay. Kinahanglan nga naa gyud mahibilin maskin usa ka miyembro sa ilang pamilya. Kung di man gyud gani mahimo, bisan ang silingan na lang nga magtan-aw tan-aw sa ilaha,” sigun ni Belciña.
Matud niya nga sa dili pa mobiya paingon sa laing lugar, i-double check usa ang mga appliances ug iseguro nga naka-unplug.
Sa mga magbiyahe, siya mipahimangno nga dili magdala ug magsuot og mga mahalon nga mga butang aron dili matintal ang mga kawatan. – /GMR) (BANAT NEWS)
- Latest
