Pekeng ‘arsobispo’
CEBU, Philippines – Mipahimangno ang mga monghe sa Lindogon Simala sa Sibonga batok sa grupo sa mga lalaki ug babayeng nagpailang mga misyonero nga nangilad kanila sa miaging buwan.
Ang maong grupo matud pa nagpailang usa ka arsobispo nga gibanabanang 50-anyos, dunay mga kuyog nga mga madre nga matud pa gikan sa Holy Trinity Congregation, usa ka pari ug usa ka diyakono.
Matud pa ni Frater Joseph ang nagpaila nga mga misyonero nangangkon nga gikan pa sila sa nasud sa Italya.
Sumala pa ni Frater Joseph mihangyo ang grupo nga makapahigayon og Santos nga Misa sa Our Lady of Lindogon Shrine Parish.
Apan miangkon kini nga daan na silang nagduda sa pagkatawo sa grupo dihang ilang namatikdan nga lahi ang gipiling sul-obon niini sa maong okasyon.
Dugang pagduda nila mao nga milihay ang maong arsobispo nga makighimamat kang Monsenyor Esteban Binghay kinsa gikan pa niselebrar og Santos nga Misa niadtong higayuna, matud pa nga mipasangil kining moadto og comfort room.Dihang nagpahigayon na sa Santos nga Misa, naobserbahan nila nga wala magkadimao ang pagmisa niini. Ug pagkahuman sa misa daling namiya ang grupo.
Gibutyag ni Frater Joseph nga nabatasan na nila nga mohatag og kwarta gikan sa donasyon niadtong mga kapariang magmisa sa ila. Matud niya ang maong grupo nakamisa na usab sa ubang simbahan dinhi sa Sugbo apan wala ma-report ngadto sa Archdiocese of Cebu. – /EIM) (BANAT NEWS)
- Latest
