CEBU, Philippines – Mga gagmay’ng magpapatigayon nakasapi g’yud kagahapon atol nga ang mga Katoliko sa tibuok kalibutan miobserbar sa Palm Sunday nga gitawag dinhi sa ato og “Domingo sa Lukay.”
Mga simbahan nga Katoliko kagahapon, ilabi na ang Cebu Metropolitan Cathedral, gihugopan sa mga tawo nga namaligya og krus nga hinimo sa lukay nga gibaligya sa lainlaing kantidad.
Wala na makuwenta kun pila ka punoan sa lubi ang gipamutlan og dahon dapit na sa udlotan nga bahin aron panghimuon nga krus ug gibaligya sa lainlaing mga simbahan.
Ang kalihukan kagahapon gitawag ‘sab og “bendeta sa lukay,” agi og paghandom diha nga si Hesukristo mibalik sa Herusalem diin gisugat siya sa katawhan nga nagwara-wara og mga palms. Nagtimaan usab kini nga nagsugod na ang Semana Santa.
Ang mga krus nga lukay gibaligya sa kantidad nga P5 alang niadto’ng yano lang ang pagkahimo, duna ‘say P10, P15 ug P20, sigun sa gidak-on ug sa desinyo sa pagkabuhat.
Si Delia Satuquia, 42, nga taga Barili, mituyo lang g’yud pag-anhi sa dakbayan uban sa iyang mga higala aron mamaligya og krus nga lukay. Matud ni Satuquia nga lima na ka tuig siya nga mamaligya og krus nga lukay dinhi sa dakbayan kada Domingo sa Lukay.
Diha magpahimutang si Satuquia gawas nga bahin sa Basilida del Santo Niño uban sa laing mga namaligya’g krus nga lukay nga taga Dalaguete, Carcar, Bogo ug uban pa nga lungsod.
Matud sa mga namaligya og krus nga lukay nga pagpanguma g’yud ang ilang panginabuhian apan panahon sa Domingo sa Lukay, mo-sideline sila sa pagpamaligya og krus nga lukay aron makakuwarta.
Ang mga tigbaligya’g krus nga lukay miingon nga sa nangagi’ng katuigan mokita sila og mga P500 ngadto sa P1,000 gikan sa halin sa ilang mga gibaligya.
Halos sa mga tawo nga gikan sa mga simbahan kagahapon pulos-pulos g’yud nagbitbit og krus nga lukay nga ila na nga gipabendetahan human sa misa.
Si Catalina Manigos, 63, gikan gihapon sa Barili miingon nga gitabangan siya sa mga sakop sa iyang pamilya aron makatigum sila og mga 800 ka krus nga lukay.
Kun mahalin ang tanan, bisan lang sa ‘tag P5 ang usa, mokita na siya og P4 mil apan matud ni Manigos nga dili gayud mahurot pagkahalin ang ilang baligya. Sagad sa mga tawo, ilabi na didto sa bukid, ang binendetahan nga krus nga lukay, ilang ibutang dapit sa pultahan sa ilang panimalay aron kuno pag-abog sa mga panuway. (BANAT NEWS)