CEBU, Philippines – Pito ka tawo ang nasikop sa operasyon sa Talisay City Police sa Sitio Galaxy, Barangay Tanke pasado alas-8 sa nakalabay nga gabii.
Ang operasyon gipangulohan ni Inspector Windell Abellana ubos sa kamandoan sa bag-ong hepe, Superintendent Germano Mallari.
Bitbit sa kapulisan ang warrant of arrest nga giisyu ni RTC Judge Eric Menchavez sa Branch 21 sa dakbayan sa Sugbo batok ni Elmer Gasalatan, 53.
Si PO1 John Ilustrisimo, desk officer sa Talisay City Police, mitug-an nga nahibaw-an nila nga didto ra nagtago sa maong lugar si Gasalatan hinungdan nga daling giporma ang grupo nga mosikop sa akusado nga kaniadto pa’ng 2013 nalutsan og warrant of arrest ug wala’y piyansya.
Apan atol sa operasyon nasikop usab ang unom ka tawo sulod sa balay ni Gasalatan nga nakuhaan og mga drug paraphernalia nga naila’ng sila si Kennette Sembrano, 30, taga San Roque, Talisay; Albert Delos Santos, 42, taga Kinasang-an Pardo, Cebu City; Benjamin Alpuerto, 26, taga Pacolob, Dumanjug; Elvin Allasgo, 36, taga Maghaway, Talisay; Alberto Cabahug, 23, taga Bulacao, Talisay; ug Reynaldo Labajo, 39, nga taga Maghaway sa maong siyudad. – /EIM) (BANAT NEWS)