CEBU, Philippines – Gipasidunggan sa kagamhanan sa dakbayan sa Bogo ang mga sakop sa Provincial Intelligence Branch (PIB) Team sa Cebu Provincial Police Office (CPPO) nunot sa pagkasikop sa giila’ng druglord nga si Joel Sumabong ug kaubanan.
Sila City Administrator Antoinetto Suico, nirepresentar kang Mayor Celestino “Junie” Martinez Jr. sa pagtunol sa Plaques of Appreciation ug pagbasa sa resolusyon nga gipasar sa konseho nga gipangulohan ni Bise Mayor Santiago Sevilla atol sa sesyon sa niaging semana.
Ang pagsikop kang Sumabong ug kaubanan niadto’ng Enero 23, 2015 gipangulohan ni SPO1 Reynaldo Solante.
Kauban ni Solante nga nidawat sa pasidungog mao sila si PO3 Rizalito Recongco, PO3 Jonathan Buscato, PO2 Lea Juarez, PO2 Persival Rerigo, PO1 Roseller Roxas, PO1 Christian Billy Illut, PO2 Jemuel Villaflores ug PO1 Mahigu Luchin Denopol.
Nitambong sa kalihukan ang bag-ong hepe sa Bogo City Police Station nga si Chief Inspector Richard Manzon Oliver.
Matud ni Solante nga kritikal ang pagkasikop kang Sumabong ug kaubanan ug ila’ng ipadayun ang pagpahigayun og operasyon batok sa uban pa’ng suspek. (BANAT NEWS)